Hvaða Hip Razical lag er best?

Síðastliðna nótt komu Hip Razical að sunnan úr Mix ehf., hljóðveri Jóns Skugga, með þrjú lög sem þeir tóku upp um helgina. Þetta eru fyrstu lögin þeirra sem eru hljóðrituð. Þau eru nú komin í spilarann hér til vinstri, en fyrir neðan hann er skoðanakönnun, um hvert laganna þriggja, It Stays the Same, O.D. eða Untrue Stories, þér finnst best.

Drangeyjarjarlinn ferðafrömuður ársins 2007

Jón Drangeyjarjarl hefur í áraraðir siglt með ferðamenn út í Drangey og sagt þeim sögur af Gretti sterka og mörgu öðru merkilegu sem tengist sögu eyjarinnar. Hann hefur byggt upp Grettislaug og aðstöðu fyrir ferðamenn á Reykjaströndinni, fyrir utan þrotlausa vinnu við uppbyggingu og viðhald á aðstöðunni í Drangey. Það væri hægt að halda lengi áfram að telja upp afrek Jóns. Síðastliðna helgi var Jón valinn ferðafrömuður ársins fyrir starf sitt. Í dómnum segir m.a. að viðurkenningin sé veitt fyrir "einstaka athafnasemi, þrautseigju og metnað við að byggja upp og reka ferðaþjónustu þar sem sagnaarfinum er miðlað á eftirminnilegan og persónulegan hátt…"

Þið sem ekki hafið farið í siglingu með Drangeyjarjarlinum, takið frá dag í sumar til að upplifa magnaða sögu- og náttúruferð!

Galdrastafir fyrir örvæntingarfulla stjórnmálamenn!

Pólitíkusar sem þurfa að slá ryki í augu kjósenda geta notað missýningastafinn Óðinn og þeir sem eru hræddir um að hafa vondan málstað geta nýtt sér galdrastafinn Máldeyfu. Vilji menn nota óhefðbundnar leiðir til að vinna kjósendur á sitt band í kosninga- baráttunni er fleiri nothæfa galdrastafi að finna á kosningavef Galdrasýningar á Ströndum. Þetta eru snillingar!

Úrslitakvöldið Hip Razical óhagstætt

Hip Razical frá Sauðárkróki lentu á úrslitakvöldi Músiktilrauna í nokkrum vanda. Tónlist þeirra hljómaði illa, sérstaklega í upphafi, sem kannski bæði má skrifa á vondan hljómburð Hafnarhússins fyrir rafmagnaða tónlist, auk þess sem hljómsveitin hafði ekki fengið nema brot af þeim hljóðprufutíma sem boðið var upp á á undankvöldinu í Loftkastalanum. Hljómurinn skánaði þegar leið á flutning laganna þriggja, en strákarnir í Hip Razcial voru hinsvegar hvorki nægilega samstilltir né öruggir. Á svona kvöldi fá menn bara eina tilraun og þurfa að "toppa" til að komast alla leið! Það tókst því miður ekki.

Í mánudagsblaði Morgunblaðsins (bls.34) segir Árni Matthíasson: "Hip Razical var…ekki eins sannfærandi og í undanúrslitum. Sveitin lenti líka í smá hljómvandræðum í fyrsta laginu, en náði sér svo ágætlega á strik. Það spillti þó nokkuð fyrir henni að bassaleikarinn er ofvirkur á bassann, spilar allt of mikið, og fyrir vikið var annað lag hennar, sem er býsna gott, leðjukennt á kafla. Síðasta lag sveitarinnar var best, mjög vel heppnað lag með fínni laglínu, sem fékk þó ekki að njóta sín sem skyldi."

Hip Razical í Músiktilraunum 2007 á laugardag

Bílskúrsbandið okkar hér í Barmahlíð á Krók er nú að á sinni síðustu æfingu fyrir úrslit Músiktilrauna 2007 sem fram fara á laugar- dag í Listasafni Reykjavíkur Hafnarhúsi. Þeir Davíð, Snævar, Styrkár og Jón Atli hafa eytt stórum hluta vikunnar í undirbúning; tónlistarlegan sem andlegan. Lögin It stays the same, Untrue Stories og OD hljóma orðið þétt og fagmannlega útfærð. Seinna í dag fer þetta framtíðarinnar stórband Hip Razical suður á bóginn, því hljóðprufur og fundur eru snemma í fyrramálið. Foreldrar sem og aðrir aðdáendur eru spenntir og ætla að fjölmenna af Krók á þennan hápunkt tónlistarferils strákanna. Miðasala hefst kl. 16, miðaverð er kr. 1.000,- og fyrstu hljómsveitir stíga á svið kl. 17.
Áfram Hip Razical!!!

Umsögn Árna Matt um Hip Razical

Í Morgunblaðinu í dag gagnrýnir Árni Matthíasson þær hljómsveitir sem komust áfram í úrslit Músiktilrauna af undankvöldi fjögur á fimmtudag, auk umfjöllunar um þær sveitir sem komust ekki áfram. Um Hip Razical frá Sauðárkróki, sem dómnefndin valdi áfram í úrslitakeppnina, segir Árni: "Hip Razical mættu til leiks eftir tveggja ára æfingar og sýndu gríðarlega framför. Það kom ekki á óvart að bassaleikur var fyrsta flokks, en gaman að sjá að öll sveitin hafði tekið stórstígum framförum, ekki síst í lagasmíðum. Músíkin var nokkuð hefðbundin – fyrra lagið emo, það síðara indískotið, en lögin grípandi góð og söngur mjög vel útfærður."

Alþjóðasamskipti og menningarmunur

Í heimi alþjóðavæðingar er margt að varast í samskiptum við þjóðir sem hafa ólíka siði og menningu. Japanska er t.a.m. annarskonar tungumál en við eigum að venjast, þar sem úir og grúir af sérstökum áherslum og tónbrigðum sem eru síbreytilegar eftir aðstæðum og því hver talar við hvern. Af tillitssemi við Gyðinga er víða ekki boðið upp á ostborgara á stöðum Burger King, því trú þeirra bannar blöndun kjöt- og mjólkurvara. Í Bretlandi er farið að kenna viðskiptaensku sem sumir myndu kalla hálfgert barnamál, en tilgangurinn er að væntanlegir viðskiptavinir finnist þeir frekar á jafningjagrundvelli á fundum. Evrópubúum og Ameríkönum þykir best að tala við fólk í u.þ.b. handleggs- fjarlægð, meðan Arabar vilja standa sem allra næst þeim sem þeir eiga samræður við. Þetta veldur oft skrautlegri sýningu í móttökuboðum, þar sem Arabarnir elta Vestrulandabúana sem ganga viðstöðulítið aftur á bak um allt herbergið.

Aðstoðum Hallbjörn við að opna Útvarp Kántrýbæ aftur!

Kúreki Norðursins er í vanda, hann vantar nokkrar krónur til að geta opnað aftur útvarpsstöðina sína. Við sem tengjumst Norðvestur- landinu, ferðumst í gegnum Húnvatsnssýslur þar sem útsendingar heyrast, eða erum áhugafólk um kántrýtónlist, hugsjónastarfsemi, landsbyggðarsérstöðu, Skagaströnd, eða bara hina þjóðþekktu guðhræddu hlýju manneskju Hallbjörn Hjartarson, eigum við ekki að láta nokkrar krónur af hendi rakna svo að Útvarp Kántrýbær gæti byrjað útsendingar aftur? Væri það ekki góð tilfinning að geta látið t.d. 1000 krónur af hendi rakna og myndað þar með þann hóp af fallega hugsandi fólki sem endurreisti Útvarp Kántrýbæ vorið 2007?

Reikn.nr: 0160-26-3906

Kt: 050635-3849

Sigurljósmyndir Elsu, Áslaugar, Evu, Thelmu og Svölu

Yngri dóttirin og hennar vinkonur sigruðu í ljósmyndamaraþoni á Opnum dögum í Fjölbrautarskóla Norðurlands vestra í síðustu viku og hafa nú sett sigurmyndirnar inn á bloggið sitt, ásamt smá skrifum um tilurð þeirra. Þemun voru fjölbreytt: Ást, Depurð, Fegurð, Draumórar, Guðdómleiki, Hatur, Pálmi, Skilningur, Snilld og Öfund. Hugmyndaflug þeirra er aðdáunarvert og ég fer ekki ofan af því að þarna eru á ferð miklir hæfileikar í túlkun og tjáningu, leikrænum tilburðum, ljósmyndun og myndvinnslu. Þær eru vel að sigrinum komnar. Til hamingju stelpur!

Ég varð listmálari seinnipartinn í dag

Netið er yndislegt fyrirbæri og fær mann stundum til að halda að maður sé eitthvað. Í dag fannst mér ég t.d. verða gríðarlega flinkur listmálari. Þá fór ég létt með að mála TVÆR Picassomyndir. Sú fyrri var svarthvít og lýsir tómleika á jólanótt í hægrisinnaðri vísitölufjölskyldu, hin síðari var í lit og tekur svona meira á alvarlegum andlegum níðingsskap sem menn horfa of mikið fram hjá í okkar þjóðfélagi. Nei annars, þessar skrautlegu skýringar komu mér bara í koll eftirá og eru hreinn uppspuni; bara til þess að láta líta út fyrir að þetta krot alltsaman sé úthugsað. En þetta var svaka gaman og alveg lygilega auðvelt með forritinu Mr. Picassohead. Trúlega verð ég ekki Dali fyrr en eftir helgi því á morgun þarf ég að aka suður og það er nú held ég farsælast að vera bara maður sjálfur við stýrið.