Útrásarkerling skilur eftir tóman dall

Gráðug kerling, hitaði sér velling, og borðaði, namm namm namm, síðan sjálf, jamm jamm jamm, af honum heilan helling. Svangur karlinn, varð alveg dolfallinn, og starði svo, sko sko sko, heilan dag, o ho ho, ofan í tóman dallinn!

Hefði verið skemmtilegra...

... ef fyrirsögnin hefði verið: Bubbi datt á rassgatið... og meiddi sig í þumlinum, lol ;)

Bubbi Morthens „flaug á hausinn"

Spurningar vakna

Árni og Darling töluðu saman í síma. Einhver hefur fengið upptöku af símtalinu í hendur til að þýða það úr dýralæknaensku yfir á íslensku, og koma því svo á prent. Síðan þurfti að koma þeim pappír til fjölmiðils, nánar tiltekið Ríkisútvarpsins. Hverjir hafa af þessu hagsmuni? Íslendingar (til að sýna umheiminum fram á að Árni sagði ekkert sem gaf Bretum tilefni til að bregðast við eins og þeir gerðu)? Dýralæknirinn sjálfur (kannski betra fyrir hann að alþjóð fái þetta á prenti, í stað þess að heyra símtalið sjálft)? Ég efast um heilindi Geirs, þegar hann segist undrandi á því að þetta hafi lekið í fjölmiðla. Ég held að hann eða hans menn hafi séð til þess að þetta var gert opinbert, með þessum hætti, eins og þeir segja í stjórnmálunum.

Furðulegt að samtalið skyldi leka í fjölmiðla

Úr takti við tíðarandann

Sumar auglýsingar virka enn afkáralegri í dag en fyrir nokkrum misserum. Meðan þúsundir fjölskyldna horfa fram fjárhagslegar hörmungar birta menn enn heilsíðuauglýsingar með rándýrum jólahlaðborðum og ýmsum öðrum óþarfa. Verslunin Duxiana í Ármúla toppar þó fáránleikaskalann í mínum huga þessa dagana. Þeir auglýsa á heilli síðu í blöðunum hjónarúm með þrjúhundruðþúsund króna afslætti; það fer úr þrettánhundruðþúsund niður í eina milljón!

Það er árið 1975...

... en ekki árið 2008, eins og sjá má á þessu:

• Við eigum í stríði við Breta
• Það eru gjaldeyrishöft
• Það ríkir óðaverðbólga
• Atvinnuleysi er vaxandi
• Vinsælustu lögin eru með ABBA og Villa Vill
• Forsætisráðherran heitir Geir og er sjálfstæðismaður
• Bankarnir eru í ríkiseigu
• Fjármálaráðherra er Mathiesen og er sjálfstæðismaður
• Seðlabankastjórinn heitir Davíð
• AC/DC er að skríða upp á vinsældalistana

Yfir 50% aukning á atvinnuleysisskrá

Landinu stjórnað af flónum

"Ykkur hefur verið stjórnað af flónum síðustu tvö til þrjú ár", segir Robert Z. Aliber í viðtali við RUV í dag. Í Mogganum segir Aliber "ólíklegt að nýir leiðtogar, sem væru valdir af handahófi í símaskrá, gætu valdið jafnmiklum efnahagslegum glundroða og núverandi stjórnvöld". Robert Aliber, sem er prófessor emeritus við háskólann í Chicago, hefur hefur á löngum ferli sínum rannsakað fjármálakreppur um víða veröld.

Hahaha...

... nýliðar Tindastóls? Veit ekki betur en Tindastóll hafi verið í efstu deild í körfubolta í yfir tuttugu ár, að árinu 2006 undanskildu. Þeir voru í úrvalsdeildinni í fyrra, og því ekki rétt að tala um nýliða.

Öruggur sigur Tindastóls gegn FSu

Aftur næsta laugardag

Þetta var langþráð samkoma fyrir marga þá sem eru í sárum eða eru reiðir útí stjórnvöld, eftirlitsapparatið og Seðalbankann. Ljóst er að þetta lið hefur brugðist okkur og við höfum rétt á því að vera reið, sýna hvort öðru samstöðu og láta í ljós skoðanir okkar. Geir getur ekki sagt okkur að sýna æðruleysi og halda stillingu ef við kjósum að hegða okkur eða tjá okkur öðruvísi. Þó mörgu hafi verið frá okkur rænt síðustu vikur verður þetta frelsi ekki frá okkur tekið. Næsta laugardag kl. 15 verður haldin önnur og fjölmennari samkoma á Austurvelli, þar sem við munum vinna áfram að því að móta okkar nýju tíma.

Mótmæla Davíð Oddssyni

Kreppan kom mér aftur á lappirnar

"Fjármálakreppan hefur komið mér aftur á lappirnar", heyrðist maður einn segja fyrr í vikunni, og bætti svo við: "Það er búið að taka af mér bílinn!"

Bjartsýnn bankastarfsmaður

Ný skilgreining á bjartsýni á þessum síðustu og verstu tímum, er þegar bankastarfsmaður tekur sig til á sunnudegi og straujar fimm skyrtur!

Snubbótt

Styttri íþróttafrétt hef ég aldrei lesið; synd og skömm, þar sem leikurinn einkenndist af mikilli baráttu og spennu. Mistök á báða bóga, gloppóttur sóknarleikur og talsverður haustbragur á báðum liðum. Við Viggó Jónsson stóðum vaktina, görguðum okkur hása og klöppuðum okkur rauðhenta til stuðnings Tindastólsmönnum í Hólminum í gærkvöldi. Sigurinn gat auðveldalega fallið beggja vegna, en heppnin var með okkur í lokin.

Tindastóll hafði Snæfell

Má grínast með sifjaspell?

Maður ætti auðvitað að láta athuga sig, að þykja þetta fyndið þegar Ólafía Hrönn nauðgar Pétri Jóhanni. Hverjum þætti það sniðugt ef dæminu væri snúið við og drukkinn boldangs Pétur nauðgaði pasturslítilli Ólafíu? Á alþjóðlegri kvikmyndahátíð í Reykjavík í fyrra sá ég dönsku myndina Listin að gráta í kór, en það er grínmynd um sifjaspell. Myndgerðarmönnum tekst hið ómögulega, nefnilega að fá mann til að hlæja með, en á sama tíma hafa innilega samúð með öllum hlutaðeigandi. Er þetta kannski bara málið í dag, að fá mann með þessu móti til að velta fyrir sér ólíkum sjónarhornum... og hlæja sig svo fram til heilbrigðrar niðurstöðu?

Má grínast með nauðganir?

Gömul saga og ný

Svo var það eitt sinn þann óra tíma,

að enga vinnu var hægt að fá.

Hver dagur varð harðsótt og hatrömm glíma

við hungurvofuna, til og frá.

Þá ólgaði hatrið sem öldur á sænum,

og auðvaldsins harðstjórum ristu þeir níð.

Og loksins kom að því þeir börðust í bænum,

um brauð handa sveltandi verkalýð.

 

Þann dag var hans ævi á enda runnin

og enginn veit meira um það.

Með brotinn hausinn og blóð um munninn,

og brjóst hans var sært á einum stað.

 

Úr Verkamanninum, eftir Stein Steinarr

Yfirbílstjórinn Davíð

Vantar þig gjaldeyri?

Þeir klikka ekki og eru alveg ómissandi á þessum viðsjálverðu tímum Baggalútsmenn. Á síðunni þeirra, baggalutur.is má nú meðal annars lesa þessar smá-auglýsingar:

Ertu í sorgarferli?

Ekki byrgja reiðina inni. Erum að ráða núna.

Handrukkun Bússa og Valda.

-----------------------------------------------------------------------------------------------------

Vantar þig gjaldeyri?

Eigum slatta af erlendri mynt sem fáanleg er gegn vægu gjaldi. Skilyrði er að gjaldeyriskaupendur kafi sjálfir eftir myntinni.

-Þingvallanefnd-

-----------------------------------------------------------------------------------------------------

Viltu slaka á eftir erfiðan dag í bankanum?

Líttu við og slakaðu á í góðra vina hópi. Alltaf heitt á könnunni. Athugið að almenningur er ekki velkominn.

Stjórnarráðið – sælureitur í alfaraleið

Elton John Lennon á Gullbylgjunni

Á útvarpsstöðinni Gullbylgjunni var í gær sagt frá því að Yoko Ono væri komin til landsins til að kveikja á friðarsúlunni og minnast með því dauða eiginmanns síns, Eltons Johns. Síðan var spilað lag með hinum samkynhneigða tónlistarmanni, sem var síðast þegar ég vissi, alveg sprelllifandi. Kannski voru það kringlóttu Lennon-gleraugun sem Elton John skartar gjarnan sem urðu til að svo heiftarlega sló útí fyrir kynninum. Vona bara að fáir Bretar hafi heyrt þetta, nóg höfum við nú böggað þá samt síðustu daga.

Söfnun í Danmörku handa fátækum Íslendingum

Þeir eru húmoristar dönsku strákarnir hjá Extra Bladet, sem stóðu í gær á götunni með söfnunarbauka og báðu fólk að gefa Íslendingum pening. Húmorinn verður svo enn beittari ef það er haft í huga hvar söfnunin fór fram, haha. Smellið HÉR til að sjá myndskeiðið (virkaði betur hjá mér í IE en Firefox).

Bankauglýsingarnar burt... í bili!

Væri ekki smekklegra, með íslenska efnahags(gl)undrið í huga, að bankarnir kipptu snarlega úr birtingu auglýsingum í fjölmiðlum; sumar með svo óviðeigandi fagurgala að manni hryllir við?

Álagspróf Fjármálaeftirlitsins

Jónas Fr. Jónsson, forstjóri FME, segir niðurstöðu álagsprófsins sýna að að undirstöður íslensku bankanna séu traustar og að eiginfjárstaða þeirra sé sterk. "Þessar niðurstöður sýna að bankarnir geta staðist veruleg áföll..."(J.F.J., 21. ágúst 2008; heimild: http://www.fme.is/?PageID=14&NewsID=188)

Einkavæðing

“Undanfarið hefur lítið farið fyrir umræðum um einkavæðingu ríkisfyrirtækja. Það er miður því ennþá stendur ríkið í atvinnurekstri sem einkaaðilar eru fullfærir um að sinna. Það sem verra er, er að flest þessi ríkisfyrirtæki eru í samkeppni við einkaaðila á markaði, en það er kunnara en frá þurfi að segja að á slíkum samkeppnismörkuðum verður samkeppnisstaða fyrirtækjanna aldrei og getur aldrei orðið jöfn. Síðan ríkisstjórn Sjálfstæðisflokks og Samfylkingar tók við völdum hefur ekkert ríkisfyrirtæki verið einkavætt.” (Sigurður Kári, 25. ágúst 2008; heimild: http://sigurdurkari.blog.is/blog/sigurdurkari/entry/625051/)