Kæri Póstur!

Mig vantar svar við vandamáli, en þannig er að konan mín vinnur oft óeðlilega lengi, kemur heim seint og angar þá af rakspíra. Hún brjálast ef ég skoða gsm-inn hennar, en hún fær oft dularfull símtöl í heimasímann sem hún neitar að segja frá. Hún er stundum úti á kvöldin og er þá keyrð heim af einhverjum manni sem ég ekki kannast við.

Einu sinni ætlaði ég að njósna og reyna að sjá betur hver þessi maður væri. Rétt áður en hún kom heim læddist ég út og faldi mig bak við mótorhjólið mitt. Þá sá ég mér til mikillar furðu olíuleka á hjólinu. Og nú spyr ég, kæri póstur, er eðlilegt að það komi leki á hjól sem er aðeins búið að keyra um 20.000 km?