Allt fæst nú orðið á afslætti...

Frá gæludýrabúðinni: Veitum í dag 15% afslátt af gullfiskum og hömstrum. 30% eldri borgara afsláttur...

Færri á leið til vinnu

Mörg þúsund manns á höfuðborgarsvæðinu fara ekki til vinnu á morgnana eins og þeir hafa gert síðustu ár. Skyldi það ekki vera meginástæða þess að umferð hefur minnkað svona?

Umferðin nú svipuð og fyrir 5-7 árum

Barnaleg afsökun

Maður er búinn að marghóta fyrrverandi konu sinni. Löggan vissi af því, en handtekur ekki manninn. Hann kemur svo og kveikir í húsi þar sem fjöldi manns býr. Þá kemur þessi yndislega barnalega afsökun frá löggunni: Við getum ekki vaktað alla menn… og öll hús… á öllum tímum !

Kveikti í húsi eiginkonunnar

Facebook tengist blogginu

Var að finna út hvernig stærsti skemmtistaður á Íslandi getur náð í greinar héðan. Í hvert sinn sem eitthvað er skráð hér, þá birtist það á síðunni minni á Snjáldurskinnu. Kúl

Ó, þjóð mín þjóð... Hvar ertu?

Vek sérstaka athygli á þessari hugvekju Láru Hönnu!

Er þetta hinn dæmigerði Íslendingur?

Ég var móðgaður, hæddur, svívirtur, kvalinn og kúgaður

Af kumpánum nokkrum, sem allt virtust geta og mega.

Og þótt ég sé maður á sigur sannleikans trúaður,

Sýndist mér stundum því von minni í flestu geiga.

 

Að endingu sagði ég yfirdrottnunarvaldinu

í alvöru stríð á hendur, án nokkurrar vægðar.

Og styrkur minn liggur allur í undanhaldinu,

Þótt einhvernjum, sýnist það málstaðnum lítið til þægðar.

 

Og stríð mitt er nútímastríð, en ekki af því taginu,

að standa til lengdar í tvísýnum vopnabrýnum.

Þið vitið að jörðin er líkt og knöttur í laginu.

Og loksins kemst maður aftan að fjandmanni sínum.

 

- Steinn Steinarr -

Svelgur sem gleypir einbýlishús

Á ferð sinni undir Vatnajökli fundu ferðamenn svelg. Slíkir svelgir eru algengir við jökuljaðra og geta verið hættulegir í að falla. Þessi svelgur var stór og létu ferðamenn Landsbjörgu vita af honum, sögðu að svelgurinn gleypti léttilega heilt einbýlishús. Það getur varla verið rétt, því það er er stórmál að koma heilu einbýlishúsi alla leið upp að Vatnajökli.

Eyðilegging áfangastaðar í ferðaþjónustu

Í gær voru fimm ár liðin frá því að Saddam Hussein náðist í holu sunnan við Tíkrit í Írak. Litla byrgið sem harðstjórinn fannst í var í kjölfarið eyðilagt. Í stað þess að leyfa heimamönnum að búa til úr því aðdráttarafl fyrir ferðamenn. Þeir sem þetta gerðu sögðu það gert til að holan yrði ekki í hugum fylgjenda Saddams að táknmynd leiðtoga síns. Tækifæri fyrir heimamenn til hafa ágætis tekjur af því að selja ferðamönnnum aðgang var þar með eyðilagt. Myrk ferðamennska (e: Dark tourism) er vel þekkt og mikið nýtt um allan heim. Maður veltir þessvegna vöngum yfir því af hverju þessi hola í Írak var eyðilögð, þegar útrýmingarbúðir nasista fá að starfa í friði með mikla aðsókn árlega.

Skagafjordur.com skáldar fyrirsagnir

Á heimaslóð Skagfirðingsins var gerð lítil könnun. Spurt var þriggja spurninga varðandi Evrópusambandið. Þegar könnuninni lauk birtist eftirfarandi fyrirsögn á vefsíðunni:

Ríflega 42% segja nei takk við Evrópukássunni

- Tæplega 48% vilja skoða málið

Samkvæmt þessu var mjótt á munum. Þeir sem hinsvegar opnuðu fréttina og túlkuðu tölfræðiniðurstöðurnar sjálfir sáu að tæp 60% sögðust annaðhvort vilja ganga í Evrópuasmbandið eða skoða málið hið fyrsta; rúm 40% sögðu nei. Í fyrirsögninni var þeim 10% hópi sem fannst hið eina rétta að ganga í sambandið alveg sleppt, og því var hún bæði villandi og röng. Hvort þetta var gert með ásettu ráði skal ekkert um sagt.

Kemur okkur þetta við?

Stundum líður mér eins og ég búi í Bandaríkjunum; alveg með ólíkindum hvað okkur er boðið uppá ofgnótt af fréttum og ekki-fréttum þaðan, margar sáraómerkilegar og að mínu mati bæði sóun á tíma blaðamanna og okkar fréttalesenda.

Bush kaupir hús í Dallas

Enn er hótað

Hótanir eru og hafa verið veigamikill þáttur í stjórnunarstíl kallsins, því miður. Í hugum margra er DO stórhættulegur íslenskri þjóð, með sína einræðistilburði og hefnigirni í garð þeirra sem honum eru ekki þóknanlegir. Hann vill ráða því hvað þjóðin má tala um, og hvað ekki; hvað sé á dagskrá í dag! Sem stjórnmálamaður er hann hreint og beint andstæðingur virks lýðræðis og frjálsra skoðanaskipta. Það er skiljanlegt að hans brenglaða persóna skynji ekki sinn vitjunartíma, en að flokkur hans skuli enn ekki átti sig á því að almenningur vill hann burt úr valdastöðum er óskiljanlegt. Segi ekki meir, en hnýti hér aftan við athygliverðu myndbandi af Youtube.

Davíð: „Þá mun ég snúa aftur"

Mönnum hent fyrir borð

Á fraktara þar sem yfirmenn voru hvítir en eingöngu svartir undirmenn kastaðist í kekki. Undirmaður reiddist þrældómnum og lét skoðun sína í ljós. Fyrir framan allann hópinn gerðu tveir yfirmenn sér lítið fyrir og hentu honum fyrir borð, á fullri siglingu úti fyrir Afríkuströndum. Íslenskur yfirmaður um borð sá þetta en gat ekkert að gert. Já það gerist margt ljótt í þessum heimi.

Ráku 115 manns fyrir borð

Yfir hundrað þúsund gistinætur

Íslensk farfuglaheimili voru valin meðal þeirra bestu í heimi nýverið. Þetta eru farfuglaheimilin í Berunesi við Djúpavog og á Ósum á Vatnsnesi. Farfuglaheimili eru góður og ódýr gistikostur á ferðalögum, en allajafna eru útlendingar stærstur hluti gesta íslenskra farfuglaheimila. Árlegar gistinætur á farfuglaheimilum hér á landi eru komnar yfir eitt hundrað þúsund.

Sama ruglið hjá RUV – Ríkisstjórnarútvarpi sumra landsmanna!

Í fjögurfréttum RUV-útvarp var sagt frá þessum mörg þúsund manna mótmælafundi á Austurvelli. Ekkert var efnislega sagt frá því sem kom þar fram í máli ræðumanna. Það var hinsvegar viðtal við átta ára stelpu sem var spurð að því hvernig henni fyndist að vera þarna innan um svona margt fólk, þar sem sumir væru reiðir. Og ég sem var að vona að ríkistúvarpið okkar væri hætt að ofbjóða okkur sem ríkisstjórnarútvarp!

Íslendingar láti ekki kúga sig

Þetta liggur í loftinu nafni

Björgvin og Þórunn eru bara að tjá sig til samræmis við vilja þjóðarinnar, sem sér í lagi vantreystir sjálfstæðisflokki til að sitja degi lengur við völd. Ef ekki verður gefin út yfirlýsing á allra næstu dögum um að kosningar verði snemma næsta vor, er hætta á vaxandi átökum og grófari mótmælaaðgerðum almennings!

Gagnrýnir Björgvin og Þórunni

Eðlilegt

Raddir fólksins heyrast orðið í æ meira mæli á netinu, hvort sem það er á bloggsíðum, fésbókum eða annarsstaðar. Meðan þetta form er að slíta barnsskónum reka menn sig á kosti og galla, og átta sig á hvernig á að nota þetta ábyrgt. Stjórnvöld og fyrirtæki ljúga að okkur hægri vinstri, eins og við höfum fengið að kynnast hér á landi síðustu misseri. Rödd fólksins, okkar raddir, verða að fá að heyrast til mótvægis við raddir aðila annarlegra hagsmuna. Eðli málsins samkvæmt tekur það tíma að átta sig á hvernig við förum best með þetta nýfengna vald.

Falla í pytti á Facebook

Spillingarlið

Alveg blöskrar manni hvað enn er í gangi af ógeði, eins og ekki sé nóg komið. Hvað finnst mönnum um ÞETTA? Fyrir þá sem ekki nenna að lesa fréttina, þá segir Mogginn m.a. þarna: "Nú ganga stærstu hákarlarnir um nýju bankana og hamast á starfsfólki að finna lausnir. Niðurfelling lána er þar efst á blaði. Einnig að aftengja ábyrgð milli félaga þeirra. Þá reynir á styrk núverandi stjórnenda!"

Mikil óvissa um Ísland

Rugl

Kirkjan er enn í tómu tjóni, í þessu máli eins og mörgum öðrum. Þeirra úrskurðanefndir telja að presturinn hafi hér breitt siðferðilega rangt, en neita samt að úrskurða skírnina marklausa. Hvar er siðferðið í því? Ómálga kornabörn eru að öllum forspurðum skráð í þjóðkirkjuna, bara ef móðirin er skráð þar. Mér fannst nægilega margt vafasamt viðgangast hjá kirkjunni til að segja mig úr þessum félagsskap fyrir nokkrum árum... og hef síðan verið í sjöunda himni

Presturinn breytti ekki siðferðilega rétt

Misskilin hagnaðarvon?

Sporðrenndi nokkrum vefsíðum með morgunkaffinu. Á dv.is var tvennt sem rann saman í eitt, annarsvegar fyrirsögnin: Þjófur tekinnn með lyftingarlóð! ...og hinsvegar: Reykjanesbær tekur á móti tugum lóða!

James Bond - The fourth cod war!